Euses Sujet heisst das Johr: „Frauen an die Macht!“

Mir hei dr Bäse in Egge gschtellt und ein uf „Wahlkampf“ gmacht.

Schwupp ischs passiert und mir si gwählt, mir chöme gar nüm drus,

scho hocke mir bi de andere Wyber z Bärn im Bundeshuus.

D‘ Departementsverteilig isch e Hit, die Fraue gönge uf s Ganze.

Bis jedi ändlich z fride isch, gäbe si enand fascht ufe Ranze.

„Ich bruch keini Soldate me!" ghörsch dr Murer Ueli lache,

„do secklet jede Find dervo, wenn die vier Wiiber s Muul ufmache!"

Es halbs Johr hocke mir Fraue jetzt scho z Bärn im Bundeshuus.

Vo Politik hei mir kei Ahnig und chöme gar nid drus.

Mir deu stricke, höggle, schnädere und drücke s Fudi breit.

Und bim Regiere mache mir eifach was eus dr Mike Shiva seit.

E Wätterfrosch duet im Schwobeland mit siner Mässerchlinge

geili Fraue grad scharewiis zu wilde Sexspiel zwinge.

Bim Schwizer Färnseh isch er früehner gsi, dä liebi Kachelmaa,

doch dört het’s ihm eifach z wenig Fraue und vil z‘ vil Schwuli gha.

Dr Eyjafjallajökull, weisch, dört z Island, dä Vulkan,

leit dr Flugverchehr z Europa lahm in sim Grössewahn.

Nid, dass mi das gross gschtört hät, nei, was mir ufe Wecker goht,

isch, dass dä Cheib duet rauche ...trotz em Rauchverbot.

Bluettrünschtig schlicht er dur d‘ Schwizer Alpe und suecht öppis z gnage.

Er frisst kei Raclette, het am Liebschte öppis, wo’n er zerscht muess jage.

Do rüeft dr Blocher: „Dir müesst dä Wolf frei zum Abschuss geh!

Dä Cheib frisst alli Schöfli vo miner SVP!“

Z Zunzge gits ume 1. Auguscht es risegrosses Gschrei.

E teilne si 30'000 Stutz vil z vil für d‘ Calmy Rey.

Die Frau sig ihres Gäld nid wärt, kei Heller und kei Pfennig,

schliesslich fiir me 1. Auguscht und nid Chluriverbrennig.

Dr Gmeindrot Geu vo Rickebach seit in ärnschtem Ton:

„E riise Gmeind Oberbaselbiet, das isch mi Vision!“

Es isch doch nid zum Glaube, was e Teil wei unterneh,

dass es in dr Zuekunft keini Zunzger me duet geh.

Es rüeft dr Papscht im Petersdom:„Ich ha igseh, das Verhüete

cha me nid ganz generell und konsequent verbiete.

In ganz spezielle Härtefäll müesst dir jetzt nümme „ohni“.

Zum Bispil, wenn dir Angscht heit, s gäb e chline Berlusconi.“

Dr Contador fahrt d‘ Tour de France und no ziemlich guet.

Doch freue cha er sich nid lang, er het Doping in sim Bluet.

Das isch kei Doping, das cha nur vom schlächte Rindfleisch cho.

Het er ächt vom Merz verdorbnigs, Bü- Bü- Bündnerfleisch becho.

S Theater z Basel, so hei mir bschlosse, wei mir nid unterstütze,

denn im Oberbaselbiet chönne mir s Gäld vil besser nütze.

Mir hälfe dr Bürgergmeind Hämmike mit eusne Subventione,

dört isch s Theater no vil grösser – und choschtet 30 Millione.

Die Dütsche si scho herti Sieche, wenn d's dir richtig überleisch:

Erscht chürzlich hei si d Ränze gfüllt mit altem Gammelfleisch.

Hüt frässe si Fleisch mit Dioxin, mir Schwizer müesste worge.

Bald muesch e Schwob, wenn er gschtorbe isch, als Sondermüll entsorge.

Dr Euro sinkt und sinkt und sinkt und git immer no meh no.

Er sinkt und sinkt und sinkt und sinkt und isch scho bald nümm do.

Er sinkt und sinkt und sinkt und passt sich dermit, so guet er cha,

dur sis Sinke und immer witer Sinke em Niveau vo de Schwobe a.

Politisiere isch e cheibe Stress, s git gar nid vil zum Lache.

Statt regiere wei mir lieber wider als Wüehlmüüs Fasnacht mache.

Will das vil choschtet dörfet dir jetzt in Putzchessel öppis geh,

viele Dank und blibet gsund, bis bald, uf Wiederseh.