Melodyy: Wellerman Song
Als Pyraate zieie miir durs Land mit eusem Schiff, dr Radicant.
Für öis, doo isch die grossi Wält e Ozean voll Gäld.
Hejhoo, dankch dr Radicant Bankch si miir glyy ryych und diir syt blankch.
Hejhoo, öisi Radicant Bankch macht d Akchzionääre chrankch.
Öise Käptn heisst John Häfelfinger, am Stammbaum noo e Wintersinger.
Für iin isch Ryychtum, Ruum und Gäld was zellt uf dere Wält!
Hejhoo, dankch dr Radicant Bankch....
Früener hei d Pyraate müesse chönne kämpfe, fächte, schiesse.
Hüt goots ooni Riisiko, doo si mir alli froo.
Hejhoo, dankch dr Radicant Bankch....
Öise Haafe heisst BLKB, vo döört uus döi miir Faart ufnee
und bevoor du öis gseesch choo, hei miir diir s Gäld scho gnoo.
Hejhoo, dankch dr Radicant Bankch....
Und in öisem Gröössewaan bruuche miir jetzt e neue Kaan
Dr alt, dää döie miir verloo, dää sell doch undergoo.
Hejhoo, dankch dr Radicant Bankch si miir jetzt ryych und diir syt blankch.
Hejhoo, öisi Radicant Bankch macht d Akchzionääre chrankch.
Hesch d Fraue Fuessball EM gsee, läkch, daas isch doch e Hitt!
Wie die alli technisch zwääg si, d Manne chömme doo nümm mit!
Dass die Fraue alli soo chönne tripple, verschtönde miir ganz guet.
Wenn d vo chlyy uf bim Brünzle aaschtoo muesch hesch die Tripplerei im Bluet.
«Du bisch es Huen und blibsch es Huen,» het dr Imark zur Leuthard gseit.
«Ich glaub, dää muess ich jetzt verchlaage,» het die sich überleit.
«Mii stöört nid emol d Beleidigung,» seit s Doris unter Trääne.
«I ha eifach Angscht, wäg dr Voogelgripp müess ich in d Quarantääne.
Und falls es doo no anderi soo Hüenergrüchtli git.
schtelli au grad klaar: «Au es Chloorhuen bini nid!»
Dr Vladimir Putin sell zum Schutz e paar Doppelgänger haa.
So bisch nie sicher, ischs ächt dr Putin oder ganz e andre Maa.
Bim Trump, doo isch daas überflüssig, dass d iim es Double gisch.
Bi iim weiss jede sowiesoo, dass er dr Duubel sälber isch.
A propo Trump: Am Trump sis Oor will me jetzt wiider flikche.
Iich ha drum dänkcht, iich chönnt iim e Fäzze vo miner Füüdlebakche schikche.
Me chönnt hundertprozänntig sicher sii, dass döört nüt passiert,
will me numme es Stükch Hutt vom einte Arsch zum andere transplantiert.
Dr Gälterchinder Biiber het me überchaared einisch Znacht.
«E klare Fall,» stell dr Wildhüeter fescht, «dää het Sälbschtmord gmacht.»
Hejoo, bim ne Deefyzytt vo anderthalb Millioone
het sich sogar dä Biiber gschämmt, z Gälterchinde z woone.
Bis Baschis sells jetzt Noochwuchs geh, si sige jetzt bald z dritt.
Eb äär sich fröit gseesch vor lutter Hoor bim Baschi leider nid.
Unrasiert, mit Schnauz und Baart und e Fryyse ooni Schnitt,
hoffe miir eifach, dass es wüürkchlich es Buschi und kei Riiseschnauzzer git.
Z Birsfälde darfsch duu dur d Quartier nümm eifach duurefaare.
Wennd schnäller bisch als e Viertelschtund muesch zaale mit dim Chaare.
Wenn daas d Zürcher au deu mache, läkch, schänkcht daas dört ii!
Wär will scho lenger als 10 Minute z Züüri oobe sii.
Bim Spaziere übere Üetlibäärg, do gseenis ganz genau:
Im Herbschtwald stoot e Maa halbnakcht, vor iim chnüündled e Frau.
Dass es settigi Ignorante gitt, lüüchtet eus nid ii!
Die wüsse ganz genau, dass doo z Züüri Laubblööser verbotte sii.
Wäg dr Klimaerweermig stige d Meerespiegel hööcher, hööcher, hööcher.
Und tääglich chunnt dr grooss Momänt nööcher, nööcher, nööcher,
wo d kei einzige Schwoob me gseesch, weisch wie miir froolokche
wenn miir ändlich z Rhyyfälde chönne an dr Nordsee hokche.
Miir si am Schluss mit eusne Bänkch, euse Raubzuug, dää isch gloffe!
D Radicant isch undergange und dr Käptn mit versoffe!
Miir gnaage glii am Hungertuech und hei nüt me z lache
und döi drum jetzt mit eusem Kässli bi euch e Rundi mache.
Wenn diir e Huffe gääbet mached diir eus Pyraate froo.
Mir döie villmool Dankschöön sääge und s nechscht Joor wider choo.
Diese Schnitzelbänke sind das geistige Eigentum der Fasnachtsgesellschaft Rickenbach.
Sie dürfen nicht ohne unsere Erlaubnis kommerziell verwendet werden.