Melody: Jenseits von Eden von Nino de Angelo
Dr Michi Schaub faart mit sim Tränkifass uf s Land
Doo dänkt er plötzlich: Ii verlier glaub dr Verstand!
Jetzt bricht doch an däm Chaare d Diechsle ab
Und mit Garacho saust dä Chlapf dr Hüübel ab.
Als Buur vo Rickebach, doo hesch es nid lyycht, es isch eifach nüt eebe.
S het numme Hüübel und Häng und du merksch, dass doo nüt richtig stoot
Wills halt überall nizzi goot.
Als Buur vo Rickebach, doo weisch doch genau, es isch eifach nüt eebe.
Bi dene Hüübel und Häng isch es guet, wenn e Buur das verstoot
Dass es überall nizzi goot.
Zum Balle prässe faart dr Björn bim Bänz uf s Land
Dass d Balle rund isch, goot nid ganz in si Verstand.
Die saust dr Hüübel ab, s isch halt nid flach
Und si haltet erscht in dr Zietmatt im Bach.
Als Buur vo Rickebach.......
***
Melody: Kiosk von Polo Hofer
Er sammlet nid für e guete Zwäkch, dä Maa, wo d Stroos ab goot.
Mit Garette und me Tresor drin, s ischs doch gar nonig so spoot.
Dä Maa, dä suecht nüt z pfuuse, das fallt dämm gar nid ii
Vill lieber bricht er bi Dämmerig in frömdi Hüüser ii.
Hüt isch s Huus vom David Ritter draa, oder vom Viddle, wie mir sääge.
Dört chönntisch ihn bi dr Arbet gsee, bim Tresor uuseträäge.
Dä Tresor, dä isch huere schwer, drum chönne mir s verstoo,
Er hett, dass es chli lychter goot, d Garette au no gnoo.
Wo denn dr Viddle hei chunnt, merkt är, s stimmt öppis nid.
Er het gar nid gwüsst, dass in sim Huus so suuberi Fänschter git.
Do merkt er, d Schiibe isch nümm dinn und im Huus isch eine gsii.
Dr Viddle rüeft: «Du dumme Siech, was meinsch denn, was i bii!»
Bini gottfriedstutz e Kiosk, oder bini öppen e Bank
Oder gsehni us wienes Hotel, oder wiene Kasseschrank?
Bini gottfriedstutz e Kiosk, oder bini öppen e Bank
Oder gsehni us wienes Hotel, oder wiene Kasseschrank?
Zum Glück het me das Diebesguet alles wider gfunde.
Dr Dieb, dä hett s vor luter Angscht lo stoo bim Fricker unde.
«Glück ghaa!» het dr Viddle gseit, «Aber ganz im Vertroue!
Dr Tresor weer mir schyssegal, aber d Garette hätt mi groue.»
I bi gottfriedstutz kei Kiosk, i bi gottfriedstutz kei Bank
Und i gsee nid us wienes Hotel, oder wiene Kasseschrank?
I bi gottfriedstutz kei Kiosk, i bi gottfriedstutz kei Bank
Und i gsee nid us wienes Hotel, oder wiene Kasseschrank?
***
Melody: Marmor, Stein und Eisen bricht von Drafi Deutscher
Dr Michel seit zu sim Brüeder: «Roy!» dingding, dingding
«Mir chauffe s Konsi und maches nöi!» blingbling, blingbling
Marmor Stei und Iise bricht. Föif, sächs Möönet bruuchts vilicht
Denn isch die Bouzytt scho vorbii, und d Mieter zieje ii.
Doch doo seit dr Heimatschutz: «Neinei, neinei,
«Soo wird nid boue, he gottfriedstutz, meimei, meimei.»
Marmor Stei und Iise bricht, will dr Heimatschutz es Machtwort spricht
Alles, alles goot vorbii, das chönne Joore sii.
D Bewilligung isch denn ändlich choo, geilgeil, geilgeil
«Und mit däm Bou cha s jetzt vorwärts goo, steilsteil, steilsteil
Marmor Stei und Iise bricht, jetzt straale beidi übers Gsicht
Am Graf si Bagger chunnt vorbii und d Muure bräche ii.
Doch denn isch irgend e Plan verrütscht, dummdumm, dummdum
Und dr Baggerfahrer het z vyll verwütscht, bummbumm, bummbumm
Marmor Stei und Iise bricht, mitem Heimatschutz goots jetzt vor Gricht
Alles, alles goot vorbii und d Bouschtell stürzt bald ii.
Jetzt isch Sissech nümm ellei, neinei, neinei
will au mir e Tschudyvilla hei, steistei, steistei
Bis Marmor Stei und Iise bricht si mir steialt, lääbe nümm vilicht
Alles, alles goot vorbii, zieht ächt je e Mieter ii?
Diese Schnitzelbänke sind das geistige Eigentum der Fasnachtsgesellschaft Rickenbach.
Sie dürfen nicht ohne unsere Erlaubnis kommerziell verwendet werden.